話明九州係以休閒式為主，當然要瞓到自然醒！11:45am先出門口是常識吧，放鬆一點不必跑景點。
博多地下有條博多一番街，壽司拉麵等等都有得食，我地揀左最後個間，食蕎麥麵。一早唔想食肉又唔想食太多，叫左個温泉蛋冷蕎麥麵。不過我見隔離啲叔叔全部都係叫一個set，又蕎麥麵又飯咁，好似好好食但真係見到都覺飽。
 |
| 温泉蛋冷蕎麥麵 |
第一個景點就去門司港！show一show張JR PASS俾車站職員睇，輕鬆入閘。
無直車去到，所以要係小倉轉車去門司港。但係JR PASS唔包博多去小倉既快車，唯有坐慢啲既，兩個鐘就到門司港喇😀
門司港最出名既呢兩條蕉
呢到係一個小漁港，沿著海邊行有風好舒服，不過真係萬里無雲，曬到喊....
好似去左第二個城市咁，係條街到見到既人唔多過10個
有好靚既歐陸風建築物，有舊大阪商船大樓、舊門司海關大樓等。因為以前係對外的關口，好多建築物都有歐洲典型的建築風格，木材為主要建築物料。
 |
| 藍翼門司 |
嗯...就係可以中間打開、升降俾船隻經過的索道橋🤔我就覺得佢既作用係為左襯托個海🤤
門司港唯一的商場，有色彩繽紛的外牆，加上放於岸邊的椅桌，好有歐洲度假既感覺。商場有少量食店同賣手信既地方。
然後，我發現我根本唔係想黎呢到，我係想去對面岸的唐户市場到食魚生😓
拿拿林問下日本叔叔點樣去，原來係返火車站隔離既碼頭到搭船去。我地行左成個圈先發現....
於是快啲趕過去碼頭，係售票機到買兩張來回船票，等左一陣就有船喇！
搭5分鐘就去到對面岸喇，望一望右手邊，就係我地既真正目的地 -- 唐户市場！
沿路見到馬騮表演
但係.... 無做足功課既我地，又再一次發現自己好垃圾.... 因為... 已經過左3點... 人地已經收！哂！檔！喇！
望住空空如也既市場，見到新鮮既魚係個養魚排到跳下跳下，卻無辦法食到即劏即食既魚生😭實在係好痛苦.... 唯有，係市場一樓既迴轉壽司舖食返餐壽司補償我地心靈上既損失。
 |
| 結論係，都好好食😍吞拿魚好正啊媽咪！ |
 |
| 我最鍾意既希靈魚！ |
小倉同門司港其實好近，15-20分鐘，但係感覺係由小鄉村一下跳到大城市。
甫行出火車站，四面都是四通八達的行人天橋，連接不同的大型商場。
由於係放工時間，滿街都係人，我地就隨意走入商場逛逛，好多都做緊優惠，立即買下心頭好！
大概夜晚9點半，商場都關門，我地就搭火車博多，返到去都已經夜晚11點，又係時候食野😂係咪覺得我地既食飯時間好怪
又去返博多站隔離既夜市街，今次試試串燒！
再一次唔知餐牌寫咩，淨係見到眼前一串串串好既串燒好吸引，於是就叫左一個雜錦併盤。
未有串燒之前，佢會送上每人一盤菜。落左少少酸味味的汁，好開胃，應該係俾你中和下，等你食串燒無咁熱氣。
10分鐘後有野食嚕！一大盤有好多種肉同菜，我最鍾意食燒茄子同燒雞肉丸！一流！
我估呢到應該係宵夜聖地，去到零晨都仲不段有人入黎食野，叫杯酒食幾串串燒傾個痛快，好熱鬧好地道！
唯一唔好處就係，日本的餐廳係可以食煙既，雖然唔係好臭，但有時都會有啲怕怕。
--
完整行程☺
搭HKExpress至福岡機場 > 入住博多站旁的Airbnb > 搵食！
博多一番街 > 門司港 > 唐户市場 > 小倉 > 食串燒！
博多 > 熊本 > 城彩苑 > 加藤神社 >上通町、下通町 > 博多
博多 > 佐世保 > 九十九島 >長崎 > 稻佐山夜景 > 博多
博多 > 天神地下街 > 博多車站買手信
博多一番街 > 福岡機場返港